التصلب الجانبي الضموري (ALS)
فاكرين تحدي التلج !! ice bucket challengeبوست النهارده عن المرض اللي اتعمل عشانه تحدي التلج سنه ٢٠١٤ رغبه في لفت النظر للمرض لجمع تبرعات لعمل أبحاث من أجل محاوله إيجاد علاج لهذا المرض و تحدي التلج انتشر علي السوشيال ميديا كهزار و محدش ركز ده كان عشان ايه اصلاالمرض ده اشتهر في الفتره الاخيره و بالذات آخر كام يوم بعد تشكك الكثير في إصابة لاعب الأهلي مؤمن زكريا به (شفاه الله و عافاه )هو مرض ALS أو بالعربي( التصلب الضموري الجانبي)
١- مش معني انه اسمه تصلب انه له علاقه من قريب أو بعيد بمرض التصلب المتعدد MS فهما مرضان مختلفان تماما و الحقيقه مضحك جدا لأي دكتور مخ و أعصاب و لو حتي كان مبتديء ان يكون هناك خلط بينهما و عشان كده موضوع ان اللاعب هيسافر ألمانيا عشان يعرف ده إم إس و لا ALS مش ممكن يكون حقيقي !!
٢- المرض بيصيب الجنسين و لكن اكتر في الرجال حول سن ٤٥ سنه و يبدأ بضعف متدرج في الأطراف ،عضلات الايد تخس ، الحركه تضعف ، الصوت ممكن يتغير ، و قد يصيب عضلات البلع و الكلام ، و حتي عضلات التنفس و هنا تكمن خطورته علي الحياه
٣ - أسباب المرض مش معروفه في قطاع كبير من الحالات و لكن هناك حالات تحدث نتيجه خلل في الجينات الوراثية Familial ALSبس طبعا الأسباب مش ممكن تكون زعل و لا ضغط نفسي زي ما تردد مؤخرا
٤- المرض يؤدي إلي ضمور في جذور الأعصاب و تحديدا في الأعصاب اللي تمثل " المفصله " بين الجهاز العصبي المركزي و الجهاز العصبي الطرفي و الأعصاب دي مكانها في الحبل الشوكي (Anterior horn cells)
٥- المرض يحدث معاه ظاهره مميزه جدا له و هي رفه في العضلات تحت الجلد (fasiculations) منتشره في معظم العضلات .. و حتي عضلات اللسان .. المريض ممكن يحسها و ممكن يشوفها .. كأن الجلد بيلعبو الرفه دي عشان منتخضش ممكن تحصل للناس الطبيعيين مع الإرهاق أو قله النوم أو الكافيين الكتير و لكن بتروح بعد كام يوم (benign fasiculations)
٦- المرض بيتشخص عند طبيب مخ و أعصاب و ليس (جراح مخ و أعصاب )طبيب المخ والأعصاب ممكن يشخصه بالكشف فقط من غير حتي اشعه واحده !! .. فحص رسم العضلات ممكن يبقي تأكيدي فقط
٧- المرض للأسف ليس له علاج حتي الان و حتي الادويه الجديده مثل riluzole و Edaravone هدفها فقط إبطاء التدهور قليلا
٨- المرض له أشكال متعدده أهونها اللي بيبدأ في الرجلين ( عشانه قدامه وقت طويل ليصل إلي عضلات التنفس) و أصعبها اللي بيبدأ بعضلات التنفس و لا يوجد طريقه معينه لتفادي أو الوقايه من المرض ده .. !!
٩- المرض لا يؤثر علي القدرات الذهنيه للمريض (الا بشكل بسيط)و لو تفتكروا عالم الفيزياء الشهير ستيفن هوكنج اللي توفي مؤخرا .. كان عنده هذا المرض
١٠- طبعا متوقع سؤال .. رأيك مؤمن زكريا عنده ايه ؟
طبعا من الصعب الحكم من خلال التلفزيون و لكن تغير الصوت يوحي للأسف ب ALSو كذلك اللاعب كان بيحط ايده تحت دقنه كتير أثناء اللقاء و ده معناه هناك ضعف بعضلات الرقبه و ده برضه يرجح كفه ALS .. اعتقد اي دكتور أمراض مخ و أعصاب في مصر يقدر يشخص الحاله بسهوله .. لدينا من الكفاءات الطبيه ما يضاهي ألمانيا و حتي أمريكاأسأل الله العظيم رب العرش العظيم أن يشفي اللاعب و جميع المرضي
